Frederik Elsner Kalaallit Nunaanni Kodap sinniisortaaraa
Kalaallit Nunaanni Kodap najuuttuunini nipilersornerup silarsuaani malunnaatilimmik kinaassusilimmik nukittorsarpaa. 1. august 2026-mit Kalaallit Nunaanni Kodap sumiiffimmi siunnersortaatut aamma sinniisuatut nipilersortartoq, erinniortoq kultureqarnermilu suliaqartoq Frederik Elsner inissippoq.
Foto: Angajo Lennert Sandgreen
Nunatsinni nipilersornerup silarsuaani Frederik Elsner malunnaateqarnerpaat akornanniippoq. Ukiut qulikkaat sinnerlugit nersornaatisisimasutut nipilersoqatigiinni Nanook’imi erinarsortartuullunilu erinniortuunermigut nunatsinnit nipilersornikkut kinguaariinni nutaani tusarnaagassanik tunniusseqataalluni Kalaallit Nunaanni nunanilu tamalaani assut annertuumik ataqqineqalerpoq. Taamaalinerani nunatsinni kultureqarnerup silarsuaata allanngoriartorfiani siamasissumik pimoorussaqarlunilu nipilersornermik ingerlatsiviup killeqarfii qaangerlugit annertuumik attaveqarfinnik pissarsiortortuuvoq.
Kodami inissisimaffimmigut nutaakkut Frederiup misilittagai, attaveqarfii ilisimasaalu Kodap, aamma nunatsinni nipilersornerup silarsuaata akornanni attaveqatigiinnermik nukittorsaaqataassapput.
”Frederik tassaavoq inuk nunatsinni nipilersornikkut avatangiisoqarfimmi amerlasuut ilisimasaat, suleqatigisaat, aammalu tatigisaat. Kalaallit Nunaanniittuni pilersitsiniarnermi atugassanik periarfissanillu iternga tikillugit ilisimasaqarpoq. Taamaattumillu nunatsinni nipilersornermik piliortartunut attaveqarnermik nukittorsaaniarluta suliaqarnitsinni ilaalernissaa assorsuaq nuannaarutigaarput,” Kodami Ilaasortanut pisortaq Martin Folmann oqarpoq.
Kalaallit Nunaanni Kodap sinniisuatut Frederik tassaassaaq Kodap aamma nunatsinni nipilersornerup silarsuaata akornanni attaveqarfik. Ilaasortanut kiffartuussinermut siunnersuisarnermullu akisussaaffeqalissaaq, kiisalu Kalaallit Nunaanni Kodap inerikkiartornissaanik nukittorsaasinnaasumik sumiiffigisami ilisimasanik ilassuteqartassalluni.
Frederik Elsnerimut suleqatigiinneq siullermik pingaarnermillu nunatsinni nipilersuusiortartunut naleqassutsinik pilersitsinissamut tunngavoq:
”Kalaallit Nunaat nipilersornikkut avatangiisunik nukittuunik, pilersitsiortartunik anguniagaqartunillu peqarpoq, taakkulu inerikkiartornermut takuneqarnissamullu periarfissatsialannik pisassaqartariaqarput. Kodap, aamma nunami sumiiffiusuni nipilersuutinik pilersitaqartartorpassuit akornanni attaveqarfiup nukittorsaaviginissaanut peqataaqataanissara, aammalu sumiiffigisami ilisimasanik qanilaarnermillu ilassuteqaqataanissara qilanaaraara,” Frederik Elsner oqarpoq.
Ilaasortani suliarisat, suleqatigiinnerit, aamma Koda Awardsinik agguaassisarnerit aqqutigalugit Kalaallit Nunaanni nipilersornerup silarsuaanut attaveqarfinnik nukittorsaaniarluni Koda ukiorpassuit ingerlaneranni anguniagaqarluni sulissuteqarsimavoq. Kalaallit Nunaanni aalajangersimasumik sinniisoqalernerminni nipilersukkanik piliaqartartut suliarisanik nalunaarsuinernit ilaasortaanernillu namminneq nipilersornikkut suliarisaminnik inerikkiartortitaqarnissamut periarfissat pillugit sunik tamanik sumiiffigisami isumasioqatiginninnermut siunnersorneqarnermullu oqinnerusumik attaveqalissapput.
Taamaalinerani nipilersukkanik piliaqartunut, kultureqarnermi sullissivinnut, aammalu sulianik ingerlatsiviusoq tamaat isigalugu Kalaallit Nunaanni nipilersornerup silarsuaanut suli qaninnerulernissaq pillugu Kodap anguniagaanut isumaqatigiissut nutaaq takussutissaavoq.
Piviusut
- Frederik Elsner 1. august 2026-mit tassaalissaaq Kalaallit Nunaanni Kodap sumiiffimmi siunnersortaa sinniisualu.
- Frederik Elsner ugguuna attavigineqarsinnaavoq: [email protected]
Kodap Kalaallit Nunaanni kulturikkut aningaasaliissutai
Kodap Kalaallit Nunaanni kulturikkut aningaasaliissutai pingaarnertut erinnanik nutaaliornermut taalliornermullu atugassiaapput, Kalaallit Nunaanni nipilersornikkut pinngorartitsinikkut siuarsaaqataasussat. Taakkuuppullu Kodap ilaasortaanneersut.
Søg støtte