Ilang David Lumholt Koda-p Saqqummersitsisarnermut Ilaasortanullu Sullissiviani nutaajuvoq, taannalu oqarasuaatikkut imaluunniit Lautrupsgade-mi naapissinnaavat. Ilannguaq nammineq nipilersuusiortuuvoq/taalliortuuvoq taamaalillunilu Koda-mi ilaasortaalluni, Kodalu illuatungeriinnit ilisimasaqarfigissallugu iluaqutissartaqarsinnaavoq.
Ilaasortanit saaffiginnissutit assigiinngitsorpassuit ullormik suliffimmik assigiinngiiaartitsisarput
’Ullormi suliffimmi nalinginnaasumi assigiinngiiaartorpassuarnik apeqquteqartoqarsinnaasarpoq. Assersuutigalugu nipilersuusiortup/erinarsuusiortup allap nipilersuusiaa allanngortillugu atornissaanik ilaasortap qinnuteqarneranut atatillugu nipilersuusiamik aalajangersimasumik kina piginnittussaatitaanersoq. Akilerneqartartut, piginnittussaanermut tunngatilugu malittarisassat pillugit apeqqutaasinnaapput imaluunniit akilinnerit aalajangersimasut pillugit apeqqutaasinnaapput, Ilang Lumholt oqaluttuarpoq.
Qaqutigoorpoq siornatigut apeqqutigineqarsup assinganik aperisoqartarnera. Suliami tassani Sherlock Holmes-iusaartoqartariaqartarpoq – ilaatigut pitsaasumik akissuteqarsinnaajumallugu pissutsit paasiniartariaqartarpakka, tamannalu nuannaraara’, Ilang oqarpoq.
Mit Koda atorlugu periarfissarpassuit
’Ilaasortat ”Mit Koda” pillugu apeqqutissarpassuaqarajuttarput, assersuutigalugu nipilersuusiat qanoq iliorluni nalunaarutigineqassanersut, tusarnaartitsinerit qanoq nalunaarutigineqassanersut, qaqugukkut akiliisoqassanersoq il.il. Maani sulilerama Mit Koda atorlugu paasissutissat qanoq annertutigisut pissarsiarineqarsinnaanersut tupaallaatiginikuuara. Assersuutigalugu nipilersuusiat aalajangersimasut allanut sanilliullugit qanoq annertutigisumik aningaasanik isertitsissutaasimanersut – aningaasat nunanit sorlerneernersut il.il. Taamaammat erinarsuusiortutut Mit Koda nalilersuinermi sakkutut atorsinnaavara, tassa takusinnaagakku nipilersuusiat assigiinngiiaartut suut nuannarineqarnersut, nunat/nipilersukkanik atuisarfiit suut nipilersuusiakka atorsimaneraat – tamanna tupaallaatissaasinnaasarpoq. Suliniuteqarfiit suut siunissami sammissanerikka tamanna takussusiisinnaasarpoq, takorloorparalu ilaatigut nunat sorliit assersuutigalugu tusarnaariartitsiviginissaannut isumaliutigisariaqarnerikka tikkuussisinnaasut.
Ilang arfinilinnik aperipallallugu:
Nammineq nipilersuusiortuuvutit/erinarsuusiortuuvutit Koda-milu ilaasortaalluti – tamanna ilaasortanik oqaloqateqaraangavit iluaqutissartaqartarpa?
Nammineq ukiut 20-t sinnerlugit ilaasortaanikuuvunga, nipilersuusiortutullu pissutsit suut atorlugit sulisoqartarnersoq ilimasuuteqarluarsinnaavunga – maannakkulli takusinnaavara Koda pillugu ilisimasakkat killeqapajaarnikuusoq. Ajoraluartumik isumaqarpunga ilaasortat ilaat, uattuulli, pissutsit tamakkiisumik paasiniarneq ajoraat, taamaammallu nipilersuusiamik/tusarnaartitsinermik nalunaarutiginissaat puigortarlugu, taamaalillutillu aningaasat pisassamik ilaat pinngitsooriataarsinnaasarlugit. Taamaammat maanga killinnera nuannernikuuvoq ilinniarfiullunilu, ilinniartinneqarninni nammineq apeqqutissarpassuakka – taamaalillungalu ilaasortat allat apeqqutaat - akissutissarsinikuuakka. Immikkoortumi pissutsit ilimagisannit assigiinngiiarnerujussuupput, pissutsillu amerlasuut nipilersuusiortutut paasiniarneqartussaapput. Ilaannut paasiuminaassinnaanerat paasilluarsinnaavara – kisiannili Mit Koda-p tunngaviusumik atorneqarsinnaanera paasigaanni, soorlu ‘nipilersuusiatit nalunaarutigikkit’ aamma ‘tusarnaartitsinitit nalunaarutigikkit’, isumaqarpunga malinaasoqarluarsinnaasoq.
Aaqqissuussivimmut nutaamut isissalluni teknologi ilaasortat ilaannut tupannarsinnaasarpoq, sungiukkaannili ajornanngitsuararsuusarpoq. Ilaasortat apeqqutissarpassui nammineq ingerlatsinernit ilisimavakka, taamaammat allat taamatut nalaataqartut ikiusinnaallugit iluarusunnartorujussuuvoq.
Kodami aallartinnginninni sunik suliaqarnikuuvit?
Koda-mi aallartinnginninni nipilersoqatigiinni ”The Benefits” nammineq suliaqarnikuuvunga. USA-mi immiussinissamik isumaqatigiissusiornitta kingorna sivikitsumik akerleriiffioqisumillu nipilersoqatigiinnikuuvugut. Nipilersoqatigiit taamaatimmata Copenhagen Business School-imi Paasisitsiniaasarnermik Aqutsinermik ilinniarneq aallartippara, tassani inuit aamma it-mi atortut, atuisut atuisarfiinik ilusilersuinerup, aaqqissuussaanermik ineriartortitsinerup nutaaliornermillu aqutsinerup imminnut atanerannik annertuunik ilinniartoqartarpoq. Taassuma qaavatigut Københavnimi IT-Universitetimi ilinniagaqarpunga, tassani e-business ilinniarlugu, tassani pineqarput internetikkut niuernermi periusissiorneq/ineriartortitsineq, it-mi atortut immikkuualuttuinut piumasaqaasiorneq il.il. 2013-imi naammassinerma kingorna nipilersornermut uterpunga, ukiunilu arlalinni soorlu Medina-mi, Rasmus Seebach-imi, Kato-mi, Burhan G-mi aamma Safri Duo-mi il.il. erinarsoqatigiinni/erinarsortutut sulisarlunga. Tassunga peqatigitillugu saqqummiisartunut isumaqatigiissuteqarlunga nipilersuusiortarpunga, erinarsuutinillu allattuivik pilersinniarlugu nunarsuarmi tamanut aallartitaasarlunga. Ukiuni pingasuni taamaaliorpunga, ilaatigullu qaammatini pingasuni Los Angeles-imiillunga, sivikitsumillu Korea Kujallermiillunga, Tuluit Nunaanniillunga, Tysklandimiillunga, Hollandimiillunga, Rumæniamiillunga il.il. Taamatullu sulivunga Koda-mi aallartinnissama tungaanut.
Kalaallit Nunaannit tunuliaquteqarputit – tamanna nipilersortarnernut sunniuteqarpa?
Aap, kisianni nammineq nipilersuusiortarninni oqimaaqatigiinngitsumik – Kalaallit Nunaanniinnitsinni nipilersortarnermi pissarsiarpassuaqarpunga. Ilaatigut Kalaallit Nunaata avannarpiaani Qaanaami najugaqarnikuuvugut, tassani anaaga qilaatersortarnermik kulturimik ilisimatusarpoq, ataatagalugu Qaanaap eqqaani qimusserluni nunaqarfeeqqani naalagiartitsisarluni. Anaanaga nalunngisakkat malillugit kalaaleq siullersaavoq Danmarkimi konservatoriami erinarsugassiarsuarnik ilinniagaqalersoq ataatagulu kingusinnerusukkut ileqqorsortartunngorpoq oqaluttuartartunngorlunilu. Angajoqqaakka qatanngutikkalu peqatigalugit angerlarsimaffitsinni erinarsortuaannarnikuuvugut, tassani gospelit, danskit tussiutaat, kalaallit tussiutaat, ileqqorsuugtit allarpassuillu erinarsortarpagut – tamatigut tulleeriilluta. Kalaallit Nunaanni tulleeriilluni erinarsortarneq ileqquusorujussuuvoq kingusinnerusukkullu oqaluffimmi erinarsoqatigiinni aamma erinarsoretarnikuuvunga, naalagiarnermilu ataatsimi 40 kr.-sisarlunga, taakkulu 4. Klassimi atuartuulluni annertungaatsiarput. Tamakku tamaasa, pingaartumik soulimik nipilersorneq, angerlarsimaffitsinni ingerlattartorujuussunikuuvagut, soorunalumi nipilersortartutut sunnernikuullunga. Naalungiarsuuninnit nipilersortunik tusaasaqartarnikuuvunga – tassani ileqqunik allanngortitserujussuarnikuunngilanga.
Nipilersuutit suut tusarnaartarpigit?
Nuannarisakka assigiinngiiaartorujussuupput allanngorartorujussuusarlutillu. Danskini erinarsortartuni maannakkorpiaq tusarnaartarpakka Phlake, Blaue Blumi, Black Dylan, Fallulah, Jakob Bellens, Alex Vargas – nunani allani erinartortartut piffissami kingullermi tusarnaartakkakka tassaapput Rihanna, Justin Bieber, Drank, Frank Ocean, Thee Weekend, James Blake, Ellie Goulding, Coldplay, Radiohead. Taakku saniatigut maannakkorpiaq Thomas Knak-ip suliaa ”Dub Tractor” utersaarfigilaaqqavara. Annikitsuliorfimmiilluni tamanna nuannersorujussuuvoq.
Nipilersornermi suna maannakkorpiaq suliaraajuk?
Ulloq taanna Koda-mi aallartikkama singeli kingulleq suliara ”Testify” P4-mi kaajallaffigaara, oktobarimilu EP siulleq nammineq suliara saqqummissaaq. Tamassuma saniatigut assersuutigalugu DJ-imut Hollandimeersumut/Frankrigimeersumut/Belgiameersumut allattarsorujussuuvunga, tassanilu erinarsuutit nammineq erinarsortarpakka. Maannakkorpiaq DJ Kenn Colt peqatigalugu singeli ”Sanctify” saqqumilaarfigaara – maannakkorpiaq ”unapalaarsuarmik” naggatillit ingerlannguatsiarpakka. Tamassuma saniatigut Asiami K-pop-imik/J-poppimik nipilersoqatigiinnut tusaamasanut erinarsuusiungaatsiarnikuuvunga.
Tusarnaartitsinermi misigisat nuannernerpaaq sunaava?
Kingullertigut tusarnaartitsisoq nuannernerpaaq tassaavoq Adele – tusarnaartitsillaqqissorujussuuoq. Umiarsualivimmi sulisutut oqaasipiluttarpoq imminullu quujassuaatigisartorujussuulluni. Tusarnaartitsinermi tassani tusarnaartut tusarnaartitsivimmut qaqisillugit sivisuumik makkuluttarpoq – naallu Forumimiikkaluarluni nuannersorujussuuvoq/eqqissisimaarnartorujussuuvoq qanillinartorujussuullunilu. Allat misigisat assersuutigalugu tassaanikuupput Roskilde Festivalimi ukiut arlaqanngitsut qaangiuttut Chemical Brother, The Prodigy, Basement Jaxx, Imogen Heap, Cypress Hill, Jose Gonzales, Slayer, John Legend, AC/DC – amerlanikooqaat. Assigiinngitsorujussuarnik nuannarisaqarpunga, aammalu sunnertiffigineqartuniit qanillinartuniillu, poppertunut toqqaannartumillu makitasuut nuannarisarsinnaasarlugit.
