Foto: Rebecca Reid
"Takuakka qaqqat kuuillu aamma pinnissuseq tamatsinniittoq’. Taama oqarnermigut erinninniortup taalliortullu qallunaap/kalaallip Simon Lynge-p inuunermik isiginneriaatsini nipilersuusiaminullu tunngavigisani eqikkarpai.
Erinarsortartoq/taalliortoq USA-mit aallaavilik Simon Lynge nuusasiaminik ’The Map Of Your Life’-mik qanittukkut saqqummersitsivoq, taannalu nuusiaasa arfinilissaraat. Simon Lynge-p nipilersuusiaasa tunuliaqutaat – nammineq oqarnera naapertorlugu – tassaaavoq ’qarasaq uummallu ammasut, ilaqutariinnit nipilersorumatuunit kingoqqineq aamma nipilersorusussuseqarneq annertooq".
Kalaallit Nunaanni sorlaqarfeqarneq
Simon Lynge-p nipilersukkamigut sorlai taaneqarnikuupput tassaasut 'inuit skandinaviamiullu'. Kalaallit Nunaanni peroriartornermini Siimuup atuarnermi avataatigut piffissaq atukulavaa sanilimik savaataanik paarsinermut. Ataataminit Kaalimit, nipilersornikkut piginnaasaqarluartumit, nipilersorfigineqartuartarpoq oqaluttuunneqartarlunilu, angutaata ilaatigut Rasmus Lyberth nipilersoqatigisarpaa. Ataataminillu kaammattugaalluni isummersorneqarneq annertuumik pingaaruteqarsimasoq Simon Lynge oqaluttuarpoq:
"Ataataga nipilersortartuuvoq, nipilersornermillu nuannarisaqarnera uannut siusissukkut sunniuppoq. Uagutsinni pattagissamik tukkartakkamik pattattarpoq, supputaasamillu aliikkusersuiuartarluni; kalaallit tussiutaat, qallunaat ileqqorsuutaat jazz-ilu annertooq. Uanga nammineq aallartippunga Holstebromi Oqaluffiup erinarsoqatigiivini, qulingiluanik ukioqarlunga, 13-inik ukioqarlunga nipilersoqatigiinni nipilersortalerpunga, erinarsuusioqqaarlungalu 14-inik ukioqarlunga".
Nipilersornikkut isummersugaaneq ilaatigut 'inunnguuseriinnarpaa', kisianni Simon Lynge aamma allatigut isummersugaasarpoq:
"Ilaatigut Paul Simon-imut assersuunneqarnikuuvunga, taannalumi isumassarsiorfigisarnikuuara, kisianni narrutunngivippunga – nipilersukkanut tunngatillugu. Uummateqarfiusoq misigisinnaagaangakku aamma tusarnaarumasarpara. Ilaatigullumi aamma erinarsortartoq/taalliortoq Amerikamioq maanna toqoreersoq Elliott Smith tusarnaartarnikooqaara," Simon Lynge nassiuaavoq.
Kalaallit Nunaanneereernermi kingorna Simon Danmarkimut nuuppoq, nipilersornermillu ilinniarnini Holstebromi nipilersornermik tunngaviusumik ilinniarfimmi konservatoriamut piareersarfiusumi ingerlateqqillugu, tassanilu tumerparpaat, noqartilik aamma opera itisileriffigalugit. Ilinniaqqikkusunneratalu guitarernermut erinarsuusiornermullu ingerlateqqippaa, tamannalu aqqutigalugu sivitsunngitsoq Københavnimi erinarsuusiortartut akornanni arlalippassuarnik erinarsuusioqataasalerluni.
Sorlaqarfiit ujartornerat
2008-mi USA-mut nuuppoq, tamaanilu suli najugaqarluni, 2010-mi nuusiani siulleq nipilersukkanik nalilersuisartut nersualaarluagut ’The Future’ saqqummersippaa. Nuusiaata siulliup nipilersortartutut inuuneq ammaappaa, ilaatigut tusarnaartitsisarluni angalasarnerit amerlaqisut kinguneralugit: ilaatigut Emmylou Harris aamma Morcheeba peqatigalugit tusarnaartitsisarluni angalanikuuvoq, nuusiamilu ’The Absence of Fear’ 2013-imi saqqummersinnerata kingorna, Danmarkimi, Savalimmiuni, Kalaallit Nunaanni, Finlandimi USA-milu tusasrnaartitsilluni angalasarnikuulluni.
Qallunaajulluni/kalaalliulluni USA-mi najugaqarnerata Simon Lynge 37-nik ukiulik erinarsuusiortarneratigut sunnerpaa:
’Kalaallit Nunaata Danmarkillu akornanni aveqqasutut inissisimanerma annertuumik sunnernikuuaanga. Arlaannaannulluunniit atasutut misigisimarpianngilanga, taamatullu ’aveqqasutut’ misiginerup erinarsuusiortarnera sunnerpaa, oqimaaqatigiissitsinissaq imaluunniit arlaannut atasutut misiginissamik ujartuisuuvunga’.
'The Map Of Your Life'
2016-imi ukiakkut Simon Lynge-p nuusiami arfinilissaat 'The Map Of Your Life' saqqummersippaa, qallunaamit Noah Rosanes-imit saqqummersinneqartoq, nuusiarlu taanna siullermiit allaaneruvoq, Simon Lynge oqaluttuarpoq:
'Akustiskimik assaannarmik nipilersukkat assut nuannarivakka, nuusiakkalumi siulliit marluk taamatut sinaakkuteqarput. 'The Map of Your Life'-mi elektroniskimik ilaqartitsinissaq ammaappara, erinarsuutillu qanoq nipeqarsinnaanerat ammanerusumik pissuseqafigalugu".
'The Map Of Your life'-p kingorna Simon Lynge nipilersornikkut suliniutinik nutaanik takorluugaqarpoq, ilaatigut 2017-imi marluullugu suliniut suli taaguuserneqanngitsoq ukiamullu tusarnaartitsilluni angalasarnissat arlaqartut, Simon Lynge oqaluttuarpoq.
Simon Lynge pillugu annertunerusumik paasissutissaqarpoq uani.
