Koda Awards 2026 Nipit nutaat, nipit pitsaalluinnartut aammalu misilittaanissamut sapiissuseqarneq

Ukioq manna ilisarititsisut Dorthea Reimer-Johansen aamma Nukakkuluk Kreutzmann Hans Lynge inersuani ulikkaaqqasumi aamma angerlarsimaffimmiittut unnummi Tûtu, SIGU & Miké, Andachan & Ivaana, Leillah aamma Hansinnguaq tusarnaartitsiffigisaanni ingerlatsipput.

Ukiumut Nersornaat 2025 - SIGU & Miké saqqummersitaq Malugivara pillugu

Ukiumut Nersornaat Naalakkersuisumit Nivi Olsenimit tunniunneqarpoq, aalajangiisartut sinnerlugit SIGU & Miké toqqarneqarneranut tunngavilersuutit tulliuttut oqaluttuarai:

”EP suliarilluagaasorujussuuvoq, eqqarsaatigilluakkamik toqqakkat aamma nipilersornikkut pitsaassuseq qaffasissoq. Pitsaassuseq tamanna tunngavigalugu saqqummersitaq nutaaliorpalaartorujussuuvoq. Nipilersornermi tamanna ersarippoq, nutaanik aamma immikkuullarissunik nipinik imaqartoq.

Saqqummersitaq aamma nipinik nutaanik nunatsinnut attuumassutilinnik imaqarpoq, taakkulu pikkunartumik naleqqussarluakkamillu atorneqarput. Tusarnaarlugit nipilersortartut pikkorissuusut ersarippoq, misilittaanissamut sapiissuseqartut. Nipilersukkat, taallat aamma nipitigut assitaliussat ataqatigiinnerat tusarnaarluarnartumik pilersitsipput. Taamaattumik SIGU & Miké EP-liaminnik Malungivara-mik Ukiumut Nersornaammik pissarsinerat pissusissamisoorluinnarsoraarput.”

SIGU & Miké nersornaaserneqarnerup kr. 25.000-nik aningaasanik pissarsipput.

Frederik Wolff Teglhus

Ukiumut Isumalluarnartumut Nersornaat- Aleq – Inuunerma Hiningani

Isumalluarnartumut Nersornaat 2025 Kommuneqarfik Sermersuumi borgmesterimit, Avaaraq Olsenimit tunniunneqarpoq.

Aleqatsiaq Pearyp nersornaaserneqarnissaanik toqqaanermut aalajangiisartut tunngavilersuipput:

”Eqqumiitsuliortup saqqummersitaa siulleq annertuumik piumassuseqarluni aamma pimoorussilluni pilersinneqarsimasoq tusaaneqarsinnaavoq. Naak siullermeerluni EP-liaagaluartoq, kusanarluinnartumik immiussaavoq aamma ersarissunik, tusarnersunik aamma suliarilluakkanik nipinik imaqarluni.

EP-mi aamma nipit immikkut ittut nunatsinnut tulluartut atorneqarput. Allaanngilaq Kalaallit Nunaanni inuit siammasissumik najugaqartut akornanni nipilersornikkut ataatsimoorfiattut ilaatigut ittartoq. Taamaammat Aleq – Inuunerma Hinningani Ukiumut Isumalluarnartumut toqqarneqarnissaminut pitsaasumik tunngavissaqarpoq.”

Tukummeq Qaavigap nersornaat soralussani Aleq sinnerlugu tiguaa, taanna nersornaatip saniatigut aningaasanik kr. 25.000-nik pissarsivoq.

Nipilersornermut 1991-mili ilaavoq

Koda Awards Kodap Kalaallit Nunaanni kulturikkut aningaasaliisarneranit tunngaveqarpoq, 1991-miilli nipilersukkanik pilersitsisut nipilersoriaatsit assigiinngitsut akimorlugit nersornaasiiffigineqartarput. Ukioq manna nersornaasiinermut aalajangiisartut tassaapput Leillah Norah Olsen, Pauli Wille (KNR), Pipaluk Lynge Berthelsen, Jorsi Sørensen, Karl Enok Mathiassen kiisalu Nukannguaq Petersen (Katuaq).

Koda Awards 2026 kalaallit nipilersortartuisa siammasissut, anguniagartuut aamma pinngorartitsinikkut pitsaassutsimik nalliuttorsiutiginniffiuvoq – saqqummersitseqqaarluni alloriaqqaarnermit misilittagartuunut, misileraalluni saqqummersitsisunut.

Kalaallit Nunaanni kulturikkut aningaasaliissutit aamma siornatigut nersornaaserneqarsimasut pillugit paasisaqarnerugit.