Oqaluttuarisaanermi eqqartuussut: OpenAI nipilersukkanik atornerluisutut eqqartuunneqartoq
Münchenimi eqqartuussiviup Europami eqqartuussivinni siullersaalluni AI-mik kiffartuussivik taallanik piginnittussaatitaanermit illersugaasunik atornerluisimasutut eqqartuuppaa. Eqqartuussut oqaluttuarisaanermi pingaaruteqartoq nipilersuusiamillu atuisoqartillugu naapertuilluartumik akilerneqartarnissamut AI-p ilorraap tungaanut ineriartulernissaanut pingaarutilimmik alloriarnerusoq Kodamit oqaatigineqarpoq.
Europami AI-mik kiffartuussivimmik taallanik piginnittussaatitaanermik illersuinermik unioqqutitsilluni atuisimasutut eqqartuussivilersuussinermi siullermi eqqartuussisoqarpoq. Tysklandimi piginnittussaatitaanernik suliniaqatigiiffik GEMA OpenAI-mut – suliffeqarfik ChatGPT-mik pilersitsisoq – suliami ajugaavoq akuersissuteqarani akiliinaniluunniit Tysklandimi taalliortunit taalliarineqarsimasunik illersugaasunik unioqqutitsilluni atuisimasoq eqqartuussivimmit nalilerneqarmat. Eqqartuussummi taamaammat aalajangersarneqarpoq GEMA-mi toqqarneqarsinnaasunik akuersissuteqarani OpenAI atuisimasoq.
Kodap eqqartuussivilersuussineranik ikorfartuisumik eqqartuussisoqarsimammat qiimaallannarpoq
- Nicky Trebbien
Kodami inatsisitigut politikkikkullu pisortaq, Nicky Trebbien, oqarpoq:
”Oqaluttuarisaanermi eqqartuussineruvoq. Europami eqqartuussivimmit siullerpaamik aalajangiunneqarpoq taallanik piginnittussaatitaanermit illersugaasunik atuinissamut AI-mik kiffartuussiviit akuersissuteqaqqaartariaqartut akiliisariaqarlutillu. Nipilersukkanik pilersitsisut pilersitaminnik AI-mik kiffartuussivinni atuisoqartillugu naapertuilluartumik akilerneqartarnissaasa qulakkeerneqarnissaannut tamanna pingaarutilimmik alloriarneruvoq. Tech-gigantit kiffartuussivimminni taallanik nipilersukkanillu atuiniarunik akuersissuteqarnissamik soorunami isumaqatigiissuteqartariaqarput nipilersornermik pilersitsisut pinngortitaannik atuiniarunik akiliisarniassammata,” Nicky Trebbien oqarpoq.
Oqaluttuarisaanermi eqqartuussut Kodap AI-mi nipilersukkanik kiffartuussivimmik Sunomik eqqartuussivimmut tunniussineranut isumaqassaaq
Kodap USA-mi tech-imik suliffeqarfik Suno sapaatip akunnerata matuma siuliani eqqartuussummut tunniuppaa Danmarkimi eqqumiitsuliortut nipilersuusiaannik – ilaatigut Aquap, D-A-D-ip, Mø-p aamma Christopher-ip taalliaannik nipilersuusiaannillu tillissimasutut. Kodap Sunomik eqqartuussivilersuussinerani tunngavilersuutit Tysklandimi eqqartuussummit uppernarsarneqartut Kodami inatsisitigut politikkikkullu pisortaa naliliivoq.
”Suno eqqartuussivimmut tunniupparput danskit taalliaanik nipilersuusiaanillu misigittaatsumik tillilluni nutaanik nipilersuusiornermut atuisimammat. Inerteqqutaaginnagani Danmarkimi nipilersornermi aningaasaqarnermik aserorterivoq ataatsimoorlutalu kulturitsinnik navianartorsiortitsilluni. Kodap eqqartuussivilersuussineranik ikorfartuisumik ullumi eqqartuussisoqarsimammat taamaammat qiimmaallannarpoq, tassa AI-mik kiffartuussiviit kiffartuussivimminni taallanik atuillutillu pilersitseqqissagunik akiliisariaqartut,” Nicky Trebbien oqarpoq.
GEMA ilaasortani erinniortut, taalliortut nipilersukkanillu saqqummersitsiviit 100.000-init amerlanerusut sinnerlugit OpenAI-mik eqqartuussivimmut 14. novembari 2024 tunniussivoq.
Ilaasortaanermut tunngatillugu apeqqutit pillugit nutaarsiassaq
Kodamut ilaasortxaanerit pillugu apeqqutissaqaruit 1. januaari 2026 nallertinnagu uunga attavigissavatsigut oq. 3330 6300 imaluunniit e-mail: [email protected] Apeqquterpassuarnut akissutit mani aamma nassaarisinnaagakkit eqqaa assavat koda.dk
koda.dk