Ukioq manna Koda Awards Nuummi Hotel hans Egedemi agguaanneqarneranni aaqqissuussamik aqutsisussaq Nathan Kreutzmann qaqimmat peqataasut qiimmareersimapput.
2018imi Koda Awardsimi nersornaasikkat
Ukioq Manna nersornaammik tunineqarpoq TIU. Tassani nipilersoqatigiit tassaapput erinarsortoq, Pernille Kreutzmann, guitarertoq, Ivik Larsen. Taakkua saqqummersitartik ’Nuunneq’ pillugu nersornaasigaapput. Ukioq Manna nersornaammik tunisisuuvoq: Nuummi borgmesteri Asii Chemnitz Narup
Naliliisartut Tiu nersornaaserniarlugu ilaatigut imatut tunngavilersuuteqarput:
`Erinarsullaqqissoq nipilersoriaatskkkut ersarissumik kinaassusilik. Qaqutigoorpoq erinnap erinarsukkallu misigissuseqarfigilluarnerisa saqqummersitamik pikkunarnerulersitsisarnerat kitaari sivikitsuinnarmillu pattagiaq taamaallat ingiortigalugit.
Eqikkaalluni pissagaanni; erinarsuusiorneq peqqissaarluinnarluni suliarineqarsimavoq. Erinarsortup kitaarertullu nipilersuut taallallu ataqatigiisinniarsimavaat kissaatigisamittut iluseqalernissaasa tungaanut.
2016-mi Koda Awards Katuap inersuaaraani pimmat Tiu nipilersorput Pernille Kreutzmannillu erinaana ini ulikkaarluaraangagu tusarnaartut nipaarulluinnartarlutik Ivik Larsen ingiuisuusoq. Kiisami tassa cd-liaat nersortarialik siorna saqqummerpoq´.
Ukioq Manna nersornaasigassatut piukkunneqartut tassaapput ‘F’ (Frederik Elsner) saqqummersitani Katassinnaanngisaq pillugu kiisalu nipilersoqatigiit Atsinnermiut aamma saqqummersitaminnut taagusiussartik pillugu.
Nersornaasiineq 25.000 koruuninik aningaaasartaqarpoq.
Ataqqinaammik Nersornaat ’Kunngi’-mut tunniunneqarpoq
Koda Awardsimi aamma ataqqinaammik nersornaasiisoqartarpoq. Tassannga "erinniornikkut, taalliornikkut Kalaallit Nunaannilu nipilersornerup silarsuaani maligassiuisoq” nersornaasserneqaartarluni. Ukioq manna inuunermini suliarpassui pillugit Frederik ´Kunngi` Kristensen ataqqinaammik nersornaaserneqarpoq. Ataqqinaammik nersornaammik tunniussisuuvoq: Nipilersortartoq Ole Kristiansen (2008mi ataqqinaammik nersornaaserneqartoq)
Naliliisartut ’Kunngi’-p nersornaaserneranut ilaatigut imatut tunngavilersuuteqarput:
’Frederik Kunngi Kristensen nuuteeqqanik pingasunik saqqummersitsinikuuvoq tamarmik malunnartumik assigiinngequteqartut. Ilisarnaalli aalajangersimasoq uteqqiattuartuuvoq. Taallat imartuut aammalu tusarnaartut assilissatullusooq takorloorlugit ’angalaqataaffigisinnaasaat’. Assersuutitut taasinnaavarput ’Qinnut’ pinngortitamik mingutsitsinermut tunngasuutitaq saqqummersitami ’Samma samma paffa paffa’meersoq.
Aamma erinarsuut katerisimaartuni tusarsaajuartartoq tassaavoq ’Pavunga qaqqamut’ tusarnaartumut takorlooruminarluinnartunngorlugu taalliaasoq.
Saqqummersitaasa pingajuanni inuit ikinngutigiittut aliannaartarnitsinnik oqaluttuartoq erinarsuut ’Ikinngutitoqannguaq’ aamma assersuutissaavoq Kunngip inoqammut qanilaassusermik anersaaqarluni taalliortarneranut.
Inuppassuit ilisimalereerpaat Parkinsonimik Kunngi nappaateqalereeraluarluni eqqumiitsulianik pinngorartitsinermik suliaqartuartuusoq. Nersualaarineq alleqqiinnartarpoq eqqarsaatigilerlugu Kunngi sajunnermik nappaateqaraluarluni suli kitaariataarluni erinniorujoortarmat.
Taamaattoq suliarpassuani nersortariallit pillugit Kunngi saqqumilaarniartuunngilaq. Tulluarnerussagunarpoq oqaraanni maniguunneq Kunngip ilisarnaatigigaa.
Taamaammat tulluartipparput Kodap ataqqinaammik nersornaasiuttagaa Frederik Kunngi Kristensenimut tunniunneqassasoq”.